SESKO A HNAI TAWH VIAU
Fabrizio Romano tarlan Manchester United chuan Benjamin Sesko chu an lâkluh theih ngei an ring a, Newcastle aia a thlan zâwk ngei pawh an inring hle.
Alex-a
8/6/20252 min read
United hian Matheus Cunha leh Bryan Mbeumo te an lâk fel hnuah striker thar an melh chhunzawm leh nghâl a, Sesko bâkah hian Aston Villa striker Ollie Watkins-a hming a ri ve bawk.
Mahse United hian Red Bull pâwl lama kum nga vêl lai lova thawk tawh, tûna United Head of Scouting ni mêk Christopher Vivell an kawl rân tih an inhria a, Sesko nen pawh hian an inlaichinna a ṭha viau ni a hriat a ni bawk. Heihi United hian an ngaipawimawh hle a, Leipzig hnêna Sesko lei chhuahna man an thehluh chhan ṭha tak pawh a ni ngeiin a rinawm.
Sesko hian United pan a duh a, club pahnihte inremna neihfel hun chiah a nghâk tawh niin Ben Jacobs leh Alex Crook te chuan an tarlang.
Vivell hian Sesko hi a hrechiang viau a, lâk a tum viau bawk a, mahse coach berin Watkins a awt ve thung nia sawi a awm bawk. Dik tak chuan Amorim hian Premier League a tlangnel sa bawk lâk a duh hmêl hle.
Hmelhriat leh lo thawhpui tawh tih vel khân kawng ro a sutloh zia leh a pawimawh loh zia chu United hian an hrechiang a, Gyökeres aṭang ringawt pawh khân. Mahse Sesko hi chu a dân a dang deuhin an hria a, Europe football inelna sâng khel dawnlo mah ila, rawn zawm a hrehlo ni a sawi a awm tlat a. Vivell-a a awm tâk avanga han ri ta hluai an ni lova, United hian kum thum dâwn lai chu anlo hêl ve tawh tih kan hriat a rinawm.
Chu bâkah United hian an lâk duh player in'a club a zâwm duh tak tak a nih loh chuan indawrna kalpui ngawt an tum lo hrim hrim a, an ngamna zât pawh an thehchhuak ngawt dâwn lo hrim hrim, Cunha leh Mbeumo te case ah pawh khan a chiang viau, tûnah United in Leipzig chu inremna neihpui tumin indawrna an kalpui mêk a, a awmzia chu player lam aṭangin duhna tak tak a awm tawh tihna a ni mai awm mang e.
Engpawh chu nise a man chungchângah hian inremna neihpui an thiam leh viau angai ngei ang a, Newcastle lamin United aiin anla thehchhuak hnem zâwk zui a, UCL an khel dawn bawk a, an tithei nganglo anih chuan Coach duhber, Premier League a tlangnel sa lamah an ṭuan leh vat a rinawm.
United hian he indawrna ah hian player pakhat zehtel theihna an sawi lang zuai a, Leipzig lam pawh hian Rasmus Højlund anlo awt ve viau bawk niin Fabrizio Romano chuan a sawi. Thûk zâwka thil hria te chuan Newcastle lam chu an phûr tawh lo hle a, an inhnukdawk hnai hle niin an sawi ve bawk.