SERIE A LAMAH JADON SANCHO!?
AS Roma chuan United hnênah Jadon Sancho chu season tluan a hawh an dil mêk.
Bryan
8/15/20252 min read
Italian club hian nizân lam khân United hnênah English forward hi season tluan a hawh a, Pound maktaduai sawmhnih(£20m) a lei chhunzawm nghâl thei turin an dil a, United hian Pound maktaduai sâwm(£10m) vel chu a hlawh aṭangin an hum theih phah dawn bawk.
Roma bâkah hian Juventus, Borussia Dortmund leh Besiktas te pawhin Sancho hi an ngaihven ve reng bawk a, Turkish club, Besiktas erawh hi chu Sancho hian alo hnar fel dêr tawh thung.
Manchester United hian Sancho hi a ngheta chhuahtîr an duh ber a, mahse a hlawh a sân em avang hian amah duhtu-te tân a harsa a, sumdâwnna ropui lo takah an chhuah leh dawn niin a lang.
Tun dinhmunah chuan Roma leh United te hian inremna an neih theih a rinawm tual tual a, United hian nipui bazar inkhâr hmaa player pahnih khat tal an lâk leh theih nan sum an mamawh ve tawh si a, chhuak tur ang te ṭhuah thuai thuai an tum tawhin a rinawm.
Sancho hi United player la ni tho mah se tûnah rih chuan team training a zawm ve ngai lova, amahin training a nei ṭhin a nih hmêl hle. Ten Hag-a enkawlna hnuaia a awmlai aṭang khân neuh neuh a nei chho ṭan a, manager nêna buaina an neih thu a puanzâr hmiah a nih kha, ngaihdam a dil duh lova, squad-ah pawh kan hmu lo vang vang a nih kha.
United hian Sancho hi kâr khatah £250,000 lawih an pe ve reng a, an sum tihektu mai ni chung si hian hralhchhuah an harsat viau thung. A hlawh sângtak avâng hian club ṭhenkhat chuan an iai deuh ṭhin a, season liamta khân hemi vang bawk hian Chelsea chuan zângnadawmna Pound maktaduai nga(£5m) sengin an thawn kîr tawh bawk.
Dortmund aṭanga Pound maktaduai sawmsarih leh pathum(£73m) sênga an lâk kha, Pound maktaduai sawmhnih(£20m) vêla an chhuahtîr thei a nih chuan, sum lamah chân duai dawn mah se Sancho tân bûl ṭan thar lehna hun ṭha tak a nih dawn mai bâkah United tân pawh ṭul loa sum an khawhral ve reng tihkianna ṭha tak a ni ve dawn tho bawk.