Kan ex-captain kan mangṭha tawh mai dawn em ni!?
Nakkum nikir thla mai a contract tâwp tawh tur Harry Maguire chuan a awm zêl dan tur a sawi.
Mawitea
8/22/20252 min read
Manchester United leh Harry Maguire te chuan an awm zêl dân tur chungchângah inbiakna an nei thuai dawn a, kan ex-captain hian tûn season chiah contact a nei tawh a, nakkum pawlkût thla an nih meuh chuan club dangin an dâwr thei tawh dawn.
Season liamta khân United hian Maguire-a contract neih lai chu kum khat dang an pawhsei sak a, han tla hniam viau mah se Rúben Amorim-a hnuaiah chuan player pawimawh tak a rawn ni chho leh a, châm chhunzawm pawh a châk viauin a rinawm.
United Premier League bul ṭanna match Old Trafford a khelhah erawh England centre-back hi bench-ah ṭhuttir a ni a, a aiah Dutch defender De Ligta'n bul a ṭan thung.
Harry Maguire chuan, "Thla thar emaw chho vel khian ka awm zêl dân tur chungchângah ṭhuthona kan nei ang a, min pawhsei sak dawn nge dawn lo a chiang vat ang chu", tiin United nen inbiakna an neih vat dawn thu a sawi a.
"Engtinnge awm zêl ka duh dân chu ka rilru-ah hian a chiang viau a, mahse tûnah rih chuan sawilan a ṭulin ka hrelo. Inkhelh chhunzawm zelna atân chuan United hi club ropui tak a ni a, khelh chhuah vat i duh a nih erawh chuan i ât viau a ngai thung."
"Keima chungchângah hian club ṭhenkhat chuan ka club te hi an rawn be pawp ve fo tawh a, chhânna pawh an dawng rang ṭhin viauin ka hre bawk", tiin United captain hlui hian a belh nghe nghe.
United ṭantute leh football ngaina tute mai bâkah inkhel en ve ngai lem lo te paw'n an uanpui ve fo kha a ni hman a, mahse Amorima'n ṭha takin an hrual chho va, tûnah chuan United tlarhnung tiphuisuitu a nih tawh bâkah season liamta phei kha chuan tlarhnung ah chauh nilo tlarhma ah thleng khân a pawimawh a, goal pawimawh tak tak a rawn khung chho a nih kha.
Amah Maguire ngei chuan, "Ka sawi tawh angin, tûnah hian United hi dinhnun ṭha takah kan awm a, thuneitute mai bâkah kan manager thleng hian a fuh chho vel vek a, kawng dik tak kan zawh chho dâwnin ka hre bawk."
"Kum ruk kal ta a ka rawn luh lai nêna tûn kan dinhmun tehkhin chuan, enkawltu te-ah ngat phei chuan danglam tawh tak a ni."
"Thla ruk dâwn kha chu ka tlahniam hman viau a, kum hnih liam ta vel kha chuan ka khêl pawh a ṭha chho viauin ka hre thung."
"Tûnah chuan ka mamawh leh ka tâna ṭha tûrah ngei ka awm a, club leh ṭantute lakah phei chuan hmun ṭha tak kala chang ve in ka hre bawk. He club tâna ka khel ve thei hi ka tân chuan chawimawina hlu tak a ni tawh a, ni tina ka lâwmna tur a ni fo tawh bawk ang."